“PENSADORA”

«Pensadora» Acrílico sobre lenzo (100 cm x 100 cm) de Viki Rivadulla

e no inicio foi o vermello

o vermello primario e cegador do sangue fértil

cereixas

e beixos novos que non nos caben nas bocas

da natura que esgaza no nacer á vida

do sol furando as pálpebras nunha tarde de agosto

do sofá de aconchegar ao quente na casa da nai

do corazón tépedo da amiga

e as palabras que pagan a pena

as que acompañan e nutren no camiño

da sororidade que avanza

que xa vai chegando e alumea

vermello tamén o resplandor fumegante da lava

na periferia dos medos

vermella a noite do vestido

casto e diminuto

da noiva que non ten altura

de tan nena

vermello Marte e a entraña da violencia

o ollo do peixe eviscerado que noutrora foi mamífero

como as mamíferas fomos noutrora peixes

azul e rubí e dourado

vermellas nosoutras

pensadoras perpetuas dun mundo que se enguedella cos nosos cabelos