O venres 12 de maio, ás 20.00 h do serán, presentaremos na capela de San Roque o Caderno de Estudos Xerais número 21: “Roteiro Pondaliano: espazos vitais” da autoría de Xosé Seoane. O acto, organizado pola A.C. Irmáns Suárez Picallo, conta coa colaboración da Deputación provincial da Coruña e do concello de Sada.
O caderno está concibido como guía básica para o roteiro que a Asociación organizará o sábado 3 de xuño por algúns dos espazos vitais de Eduardo Pondal Abente, o bardo bergantiñán, localizados arredor do seu Ponteceso natal.
Con este roteiro preténdese non soamente facer un necesario achegamento á figura e á obra do bardo, senón que tamén quere mergullarnos de cheo no noso pasado, nas nosas raíces para dese xeito darnos a posibilidade de conducirnos no presente para proxectármonos a un futuro esperanzador no que recuperemos a esencia do máis noso: a lingua, a literatura, a historia, a arte… A perfecta comuñón coa terra nosa.
A guía está organizada cronoloxicamente en torno ao perfil biobibliográfico de Pondal, relacionando a súa obra poética coa paisaxe, a historia, a etnografía, a arte, a cultura popular…, que se respiran en cada un deses lugares a través de pequenos apuntamentos informativos.
A escolma poética está tirada de textos seleccionados do libro “Queixumes dos pinos e outros poemas”; Edicións Castrelos. Vigo, 1970.
No acto contaremos coa participación da artista sadense Sofi Peries que interpretará poemas de Pondal con ritmos adaptados de rhitman blues, hip hop, soul…
