 |
Autorretrato de Isaac Díaz Pardo. Imaxe cedida por Xosé Díaz |
|
Para aproximármonos ao seu singular e complexo universo, dividiuse a mostra en dez apartados que analizarán e divulgarán ao home e a súa obra: a importancia do pai –Camilo Díaz Baliño– no desenvolvemento da súa personalidade; a infancia e mocidade compostelá; a faceta de pintor, que deixou unha profunda pegada en todas as súas realizacións; o seu contacto co exilio e o seu compromiso pola recuperación da memoria histórica; o labor como escritor; os emprendementos empresariais, con Sargadelos como buque-insignia das súas realizacións industriais; as iniciativas culturais e investigadoras, entre as que cabe destacar o Seminario de Sargadelos ou o Instituto de Galego de Información; o deseñador industrial que proxectou máquinas, porcelanas, mobles ou edificios; o editor incansable da memoria histórica; e finalmente o recuperador –con Luis Seoane– da vangarda artística galega anterior á Guerra Civil coa posta en marcha do Museo Galego de Arte Contemporánea Carlos Maside. En fin, unha exposición que pretende lembrar a un personaxe irrepetible que abordou múltiples disciplinas, tanto as relativas ao mundo da arte, como ás do intelecto, ás técnicas ou ás industriais, e sacou adiante importantes iniciativas que acadaron un salientable papel no conxunto da cultura galega do século XX. Unha mostra que procura, ademais, expresar a excelencia humana de Díaz Pardo, posiblemente o personaxe máis homenaxeado, admirado e querido da historia recente de Galicia.
A exposición contará cun espazo audiovisual central que vertebrará as súas diferentes seccións, creado por Cecilia Díaz e Jordi Cussó, e no que a través de fragmentos de entrevistas de arquivo se irá desgranando o pensamento de Isaac Díaz Pardo sobre diversos aspectos relacionados coa súa azarosa vida e o seu compromiso con Galicia.
Por outra banda, presentarase coincidindo coa exposición unha páxina web sobre a vida e obra de Isaac Díaz Pardo, coordinada por María América Díaz. Durante a mostra estará vinculada á páxina web da Fundación Cidade da Cultura e, con vocación de continuidade, unha vez clausurada a exposición, pasará a aloxarse en www.cultura.gal.
 |
1920-2020 | ANO ISAAC DÍAZ PARDO |
