A IMAXE COMENTADA: O DÍA DA ÁRBORE

Día da Árbore e 1925 no Couto, onde hoxe está situado o cuartel da Garda Civil, fronte á que entón era a Casa do Concello. Nas seguintes imaxes, detalle da foto anterior e Federico García, presidente da Asociación de Amigos del Árbol. Fondo fotográfico Memoria de Sada




Cando eramos nenos, unha das festas que máis nos ilusionaba era a “Festa da Árbore”. Unha vez o ano celebrábase esta festa na meta-de do inverno. Era organizada polo Concello, que contaba coa colaboración do párroco e dos mestres de todas as escolas do municipio. O día da celebración, de cada escola saían os nenos en filas portando unha bandeira e xuntábanse todos no lugar onde se plantaban as árbores. Dous eran os lugares onde se facía a plantación. Primeiro, fronte á praia, no lugar que hoxe ocupa a Sociedad e os terreos seguintes. Aínda hoxe quedan algunhas árbores plantadas entón. O outro lugar era O Couto, en Sada de Arriba, no lugar onde está o cuartel da Garda Civil. 




Unha vez todos xuntos cantabamos o himno da árbore: «Cantemos al árbol que voy a plantar / si Dios lo protege del aire y del viento / salud y riqueza dará / etc etc.». A continuación, facíase a plantación. 



Seguían os discursos do alcalde de turno, e de D. Federico García, presidente da Asociación de Amigos del Árbol. Viña todos os anos á festa e tamén ía a todos os concellos da provincia. Era moi popular e tiña unha biografía extraordinaria, tendo sido mestre, xornalista cofundador de El Ideal Gallego, redactor, tenor da agrupación El Eco, etc. Pechaba o acto D. Juan Villanueva, párroco de Sada. 

Logo da plantación, viña o que máis nos gustaba. Levábannos ao salón Moderno e alí púñannos en filas e dábannos un bocadillo. Naqueles anos da posguerra, para moitos era un gran día, porque tiñan un bocadillo. Cos anos, esta festa desapareceu, porén, moitos anos atrás era unha festa obrigatoria, xa que había unha gran deforestación en España. Este ano, o Concello vén de recuperar a Festa da Árbore. 
María Babío Tíe / memoriadesada.com

Partillar

Deixa unha resposta

O teu enderezo electrónico non se publicará