Francisco A. Pita Fernández
Da biografía do pintor Urbano González sabiamos que acadou a praza de Modelado e Baleirado de Adorno na escola de Belas Artes da Coruña (hoxe Escola de Arte Pablo Picaso) en 1893 á idade de 25 anos, segundo se desprende da Folla de Servizo certificada o día 30 de Maio de 1905 polo lo Secretario da Escuela de Industrias y Bellas Artes de La Coruña, D. Isidoro Brocos. Nela di textualmente: “En Mayo de 1893, obtuvo la aprobación de sus ejercicios por unanimidad de votos en las oposiciones a la Ayudantia de Modelado y Vaciado de adorno, vacante en la Escuela de Bellas Artes de La Coruña”.
Desexando ter máis información recabamos a colaboración do profesor de dito Centro D. José Luis Neira López, quen buscando nos arquivos e documentos que se custodian na citada Escola facilitounos a seguinte información, procedente dos libros de actas:
En setembro de 1891, dous anos antes de obter a praza xa citada, nomeouse a Urbano profesor axudante nas disciplinas Debuxo de Adorno, Debujo de Paisaxe e Debuxo de Figura. Con posterioridade, o 5 agosto de 1901, iníciase o nomeamento como titular da cátedra de Aplicacións do debuxo artístico ás artes decorativas. Nas actas posteriores a 1901 cítase a Urbano como profesor asistente, pero a partires de 1905 non constan xa máis datos, polo que se supón causou baixa ao trasladarse á Escola de Artes Aplicadas e Industrias de Santiago.
Do que realmente non tiñamos constancia é de que Urbano tamén fora alumno de dita Escola, segundo o acredita o documento que se acompaña. Así, en setembro de 1887, á idade de 19 anos matricúlase na asignatura Copia do Xeso e ao tempo presenta unha instancia na que solicita que tendo sido alumno da Escola De Bellas Artes de na Habana se lle examine dos estudios de Debuxo elemental para poder matricularse.
